மத்திய அரசு ஊழியர்களின் ஓய்வு வயது 62 ஆக உயர்வா?

புதுடெல்லி : ஊழியர்கள் ஓய்வு பெறும் வயதை மத்திய அரசு 62 ஆக உயர்த்த உள்ளது என்ற பேச்சு பரவலாக எழுந்துள்ளது. ஆனால், அது போன்ற திட்டம் எதுவும் இல்லை என்று உயர் அதிகாரிகள் தெரிவித்துள்ளனர். ஊழியர்கள் ஓய்வு பெறும் வயதை மத்திய அரசு 1998ம் ஆண்டு முதல் 58லிருந்து 60 ஆக உயர்த்தியது. பெரும்பாலான மத்திய அரசு துறைகளில் ஓய்வு வயது 60 ஆகவே உள்ளது. ஆசிரியர்கள், விஞ்ஞானிகளின் ஓய்வு வயது 62 ஆக உள்ளது. தற்போது ரயில்வே உள்ளிட்ட மத்திய அரசு துறைகளில் 50 லட்சம் தொழிலாளர்கள் பணிபுரிகின்றனர்.

இந்நிலையில், ''ஊழியர்கள் பென்ஷன், இதர பயன்களை வழங்குவதற்கு ஆகும் செலவுகளை கட்டுப்படுத்தினால் நடப்பு ஆண்டில் நிதி பற்றாக்குறையை சமாளிக்க உதவியாக இருக்கும் என்று அரசு கருதுகிறது. எனவே ஊழியர்கள் ஓய்வு பெறும் வயதை 2 ஆண்டுகள் உயர்த்துவது குறித்து மத்திய பணியாளர் துறை திட்டமிட்டு வருகிறது. மக்களவைத் தேர்தலுக்கு முன்னதாகவே இதற்கான நடவடிக்கை எடுக்கப்படும்'' என்று சில பத்திரிகைகளில் செய்திகள் வெளியாகியுள்ளன.

ஆனால், இதுபோல எந்த திட்டமும் மத்திய அரசிடம் இல்லை என்று அரசு உயர் அதிகாரிகள் தெரிவித்துள்ளனர். ''ஓய்வு பெறும் வயதை உயர்த்த வேண்டும் என்றால் அனைவரிடமும் அது குறித்த கருத்துகளை கேட்க வேண்டும். மத்திய நிதி அமைச்சகத்திடம் கலந்து ஆலோசிக்க வேண்டும். நிதி அமைச்சகத்தின் அனுமதியில்லாமல் இதை நிறைவேற்ற முடியாது'' என்றனர். பல்வேறு மாநிலங்களில் ஓய்வு வயது 60 ஆகவே உள்ளது. சட்டீஸ்கர் மாநில அரசு சமீபத்தில் ஓய்வு வயதை 60லிருந்து 62 ஆக உயர்த்தியுள்ளது.