சி.பி.எஸ்.இ. இணைப்பைப் பெற தனியார் பள்ளிகள் மாநில அரசுகளிடம் இருந்து தடையில்லாச் சான்றிதழ் பெறத் தேவையில்லை என விதிகளில் மாற்றம் செய்யப்பட்டுள்ளது.
கடந்த மாதம் மேற்கொள்ளப்பட்டுள்ள இந்தத் திருத்தம் அரசிதழில் வெளியிடப்பட்டவுடன் நடைமுறைக்கு வரும் எனத் தெரிகிறது.
இந்த மாற்றத்தின் மூலம், சி.பி.எஸ்.இ. பள்ளிகளைத் தொடங்க தடையில்லாச் சான்றிதழ் பெறுவதில் நடைபெறும் பல்வேறு கட்ட முறைகேடுகள் இனி நடைபெறாது என்று தனியார் பள்ளி நிர்வாகிகள் நம்பிக்கைத் தெரிவித்தனர்.
ஏற்கெனவே இருந்த விதிகளின்படி, மத்திய இடைநிலைக் கல்வி வாரியம் (சி.பி.எஸ்.இ.) இணைப்பைப் பெறுவதற்கு விண்ணப்பிக்கும்போதே தனியார் பள்ளிகள் மாநில அரசுகளிடம் இருந்து தடையில்லாச் சான்றிதழ் பெற்றிருக்க வேண்டும்.
புதிய விதிகளின்படி, பள்ளித் தொடங்குவதற்கான முன் அனுமதி மட்டும் பெற்றிருந்தாலே சி.பி.எஸ்.இ. அமைப்பிடம் இணைப்பைப் பெறுவதற்கு விண்ணப்பிக்கலாம். அப்போது, சி.பி.எஸ்.இ. இணைப்பைப் பெறுவது தொடர்பாக மாநில அரசுக்குத் தெரியபடுத்தியதற்கான ஆவணத்தை மட்டும் சமர்ப்பித்தால் போதுமானது. இணைப்பு வழங்குவதற்கான பணிகளின்போது ஏதேனும் ஆட்சேபம் எழுந்தால் மட்டுமே மாநில அரசுகளிடம் இருந்து தடையில்லாச் சான்றிதழைப் பெற வேண்டும் என திருத்தப்பட்டுள்ளன.
சி.பி.எஸ்.இ. பள்ளிகளுக்கான தடையில்லாச் சான்றிதழ் வழங்குவதில் மாநில அளவில் அதிக ஊழல் நடைபெறுவதால் இந்த மாற்றம் கொண்டுவரப்பட்டதாக மத்திய மனித ஆற்றல் மேம்பாட்டுத் துறை இணையமைச்சர் சசிதரூர் தெரிவித்திருந்தார். தமிழகத்தில் இப்போது 350-க்கும் மேற்பட்ட சி.பி.எஸ்.இ. பள்ளிகள் உள்ளன. மேலும் பல பள்ளிகள் சி.பி.எஸ்.இ.க்கு மாற தடையில்லாச் சான்றிதழ் கோரி விண்ணப்பித்துள்ளன. இந்த விதிகளின் மாற்றத்தால் தமிழகத்தில் சுமார் 2 ஆயிரம் தனியார் பள்ளிகள் சி.பி.எஸ்.இ. பள்ளிகளாக மாறும் என தமிழ்நாடு மெட்ரிக் மேல்நிலைப் பள்ளிகள் சங்கத்தின் பொதுச்செயலாளர் கே.ஆர்.நந்தகுமார் தெரிவித்தார்.
இதுதொடர்பாக அவர் மேலும் கூறியது: இந்த ஆண்டு மட்டும் சி.பி.எஸ்.இ. பள்ளிகளைத் தொடங்குவதற்கு தடையில்லாச் சான்றிதழ் கோரி 654 தனியார் பள்ளிகள் விண்ணப்பித்துள்ளன. இந்தச் சான்றிதழ் வாங்குவதற்கு பல லட்சங்கள் வரை செலவாகிறது.
தடையில்லாச் சான்றிதழ் தேவையில்லாததால் இதில் ஊழல் பெருமளவுக்குக் குறையும். போதிய இடம், நல்ல கட்டடங்கள் உள்ள தனியார் பள்ளிகள் இனி சி.பி.எஸ்.இ.யுடன் இணைப்புக் கோரி நேரடியாக விண்ணப்பிக்கலாம்.அதேநேரத்தில், மெட்ரிக் பள்ளிகள் தொடங்க மாநகராட்சியில் 6 கிரவுண்ட நிலமும், மாவட்டத் தலைநகரங்களில் 8 கிரவுண்ட் நிலமும், நகராட்சிகளில் 10 கிரவுண்ட் நிலமும், பேரூராட்சிகளில் 1 ஏக்கர் நிலமும், கிராம ஊராட்சிகளில் 3 ஏக்கர் நிலமும் இருக்க வேண்டும்.
ஆனால், சி.பி.எஸ்.இ. பள்ளிகளின் இணைப்பைப் பெற பள்ளிக்கு நல்ல உள்கட்டமைப்பு வசதிகளுடன் 2 ஏக்கர் நிலம் இருக்க வேண்டும் என்றார் அவர்.
கருத்துகள் இல்லை:
கருத்துரையிடுக