பரீட்சைக்கு படிக்காததால் ஒரு மாணவி பள்ளிக்கு வெடிகுண்டு மிரட்டல் விடுத்தார். போலீஸ் பிடியில் சிக்கிய அவர் தற்கொலை மிரட்டல் விடுத்தார். அவரை போலீசார் எச்சரித்து விட்டனர்.
மதுரை மாவட்டம் திருப்பரங்குன்றம் அருகே உள்ள திருநகர் பசும்பொன் நகரில் இந்திராகாந்தி நினைவு மேல்நிலைப்பள்ளி உள்ளது. இங்கு நான்கு நாள் விடுமுறைக்கு பிறகு நேற்று காலை பள்ளி திறக்கப்பட்டது.
மாணவ– மாணவிகளும், ஆசிரிய– ஆசிரியைகளும் பள்ளிக்கு வந்து கொண்டிருந்தனர். வேடர்புளியங்குளத்தைச் சேர்ந்த மாணவி ஒருவர், பள்ளிக்கு வந்தபோது, ஸ்கூட்டரில் வந்த ஒருவர் வழிமறித்து, தனது குழந்தை இதே பள்ளியில்தான் படிக்கிறது.
அவர் இன்று வரமுடியாததால், இந்த லீவு லெட்டரை பள்ளியில் சேர்த்து விடுங்கள் என ஒரு கடிதத்தை கொடுத்துள்ளார். அதனை வாங்கிய மாணவி, ஆசிரியர் கட்டப்புளியிடம் கொடுத்துள்ளார். அதனை பிரித்து பார்த்த அவர், அதில் பள்ளிக்கு வெடிகுண்டு மிரட்டல் இருப்பதை கண்டு அதிர்ச்சி அடைந்தார்.
இதுகுறித்து தலைமை ஆசிரியை கார்த்திகாயினிக்கு தகவல் தெரிவிக்கப்பட, அவர் போலீசில் புகார் செய்தார். அதன்பேரில், திருப்பரங்குன்றம் போலீஸ் துணை சூப்பிரண்டு புருசோத்தமன் மற்றும் போலீசார் பள்ளிக்கு விரைந்து சென்று அதிரடி சோதனையில் ஈடுபட்டனர். மெட்டல் டிடெக்டர் கருவிகள் கொண்டு தீவிரமாக கண்காணித்தனர்.
இந்த சோதனையில் அந்த பகுதியில் பரபரப்பு ஏற்பட்டது. பள்ளிக்கு விடுமுறையும் அறிவிக்கப்பட்டது.
வெடிகுண்டு மிரட்டல் குறித்த தகவல் வெளியானதும் பெற்றோர் பள்ளிக்கூடத்தில் குவியத் தொடங்கினர். அவர்கள், தங்கள் குழந்தைகளை அவசரம் அவசரமாக வீட்டுக்கு அழைத்துச் சென்றனர்.
மோப்ப நாய் வரவழைக்கப்பட்டும் பள்ளியில் அதிரடி சோதனை நடத்தப்பட்டது. இதனால் அந்த பகுதி பரபரப்பாக காணப்பட்டது.
கடந்த சில நாட்களுக்கு முன்பும், இந்த பள்ளிக்கு இதுபோன்று வெடிகுண்டு மிரட்டல் வந்ததாக கூறப்படுகிறது. அன்றைய தினம் திருமங்கலத்தில் உள்ள ஒரு தனியார் பள்ளிக்கும் வெடிகுண்டு மிரட்டல் விடுக்கப்பட்டது. இதனால், அன்று 2 பள்ளிகளுக்கும் விடுமுறை விடப்பட்டு இருந்தது.
தற்போது 2–வது முறையாக இந்திராகாந்தி நினைவு பள்ளிக்கு மிரட்டல் கடிதம் வந்துள்ளது. அந்த கடிதத்தில் கூறப்பட்டுள்ள வாசகங்கள் வருமாறு:–
‘‘இன்று உங்கள் பள்ளியில் குண்டு வெடிப்பது நிச்சயம். அன்று ஒரு நாள், உங்களுக்கு எச்சரிக்கை மட்டுமே அளிக்கப்பட்டோம். ஆனால் இன்று கண்டிப்பாக நிறைவேறும். உங்களால் இந்த குண்டு வெடிப்பை தடுக்க முடியாது. முடிந்தால் உங்கள் மாணவர்களை காப்பாற்றிக் கொள்ளுங்கள். இது உண்மை.
இவ்வாறு அதில் கூறப்பட்டுள்ளது.
வெடிகுண்டு மிரட்டல் விடுக்கப்பட்ட பள்ளியில் இருந்து சற்று பக்கத்தில் உள்ள ஒரு வீட்டில்தான் ஆர்.எஸ்.எஸ். இயக்கத்தின் தேசிய தலைவர் மோகன் பகாவத் தங்கி இருந்தார். இந்த வீட்டில் தங்கி இருந்துதான் மதுரை மாவட்டத்தில் பல்வேறு நிகழ்ச்சிகளில் கலந்து கொண்டு வருகிறார். இசட்.பிளஸ். பாதுகாப்பில் அவர் இருப்பதால் அவர் செல்லும் வழி எங்கும் போலீசார் பாதுகாப்புக்காக நிறுத்தப்பட்டுள்ளனர்.
இந்த நிலையில் அவர் தங்கி இருந்த வீட்டின் அருகே உள்ள பள்ளிக்கு வெடிகுண்டு மிரட்டல் வந்ததால் பெரும் பரபரப்பு ஏற்பட்டது. அவர் தங்கி இருந்த வீட்டிலும் போலீசார் சோதனை நடத்தினர். சுமார் 2 மணிநேர சோதனைக்கு பிறகு வெடிகுண்டு எதுவும் சிக்கவில்லை. யாரோ கிளப்பி விட்ட வதந்தி என்பது தெரியவந்தது.
ஆனாலும் கடிதம் எழுதி மாணவியிடம் கொடுத்தது யார்? என்பது குறித்து தீவிர விசாரணை நடத்தப்பட்டது. இந்த விசாரணையில் அதே பள்ளியில் பிளஸ்–2 படிக்கும் ஒரு மாணவி நேற்று நடந்த மாடல் தேர்வுக்கு படிக்காததால் பள்ளிக்கு விடுமுறை விடட்டும் என்ற எண்ணத்தில் இந்த வெடிகுண்டு மிரட்டல் கடிதத்தை எழுதியது தெரியவந்தது.
அந்த மாணவியை கண்டுபிடித்து போலீசார் விசாரித்தபோது தெரியாமல் செய்துவிட்டேன். என்னிடம் மேற்கொண்டு விசாரணை நடத்தினால் தற்கொலை செய்துவிடுவேன் என்று மிரட்டல் விடுத்தார். இதனால் போலீசார் எதிர்காலம் நலன் கருதி அவரையும், அவரது பெற்றோரையும் எச்சரித்து இனிமேல் இதுபோன்று செய்தால் நடவடிக்கை எடுக்கப்படும் என்று கூறினர்.
கருத்துகள் இல்லை:
கருத்துரையிடுக