பணியிட மாறுதல் கலந்தாய்வு பிரச்னை: 2-வது நாளாக ஆசிரியர்கள் ஆர்ப்பாட்டம்

சிவகங்கை, செப். 17: சில பள்ளிகளில் உள்ள பணியிடங்களை பட்டியலில் வெளியிடாமல், ஆசிரியர் பணியிட மாறுதல் கலந்தாய்வு நடத்தப்படுவதாகக் கூறி  சிவகங்கையில் ஆசிரியர்கள் 2-வது நாளாக ஆர்ப்பாட்டத்தில் ஈடுபட்டனர். (படம்) சிவகங்கை ஆர்.சி. நடுநிலைப் பள்ளியில், ஆரம்பப் பள்ளி தலைமை ஆசிரியர்களுக்கான பணியிட மாறுதல் கலந்தாய்வுக் கூட்டம் சனிக்கிழமை நடைபெற்றது. எந்தெந்த பள்ளிகளில் தலைமை ஆசிரியர்கள் மாறுதல் நடைபெறும் என்ற பட்டியல்  அறிவிப்புப் பலகையில் வெளியிடப்பட்டிருந்தது.  அதில், இளையான்குடி ஒன்றியத்தில் வேலடிமடை, திருப்புவனம் ஒன்றியத்தில் நைனார்பேட்டை, டி.ஆலங்குளம் ஆகிய பள்ளிகளின் பெயர்கள் இடம் பெறவில்லை எனக் கூறப்படுகிறது. இந்நிலையில், பிரச்னைக்குரிய இடமான இளையான்குடி, திருப்புவனம் ஒன்றியங்களை  விடுத்து, மற்ற ஒன்றியங்களுக்கு முதலில் கலந்தாய்வு நடத்துமாறு ஆசிரியர்கள் கூறினர்.  அதன்படி, காலையில் மற்ற ஒன்றியங்களுக்கான கலந்தாய்வு நடந்து முடிந்தது. பிற்பகலில் விடுபட்ட பள்ளிகளையும் பட்டியலில் சேர்க்குமாறு, மாவட்டக் கல்வி அதிகாரியிடம் தமிழ்நாடு ஆரம்பப் பள்ளி ஆசிரியர் கூட்டணி சார்பில் கோரிக்கை  விடுக்கப்பட்டது.  அப்போது அவர், அரசு அதிகாரிகளின் உத்தரவின்படியே இந்தப் பள்ளிகளின்  பெயர்கள் பட்டியலில் இடம் பெறவில்லை என்றாராம். இதனை ஏற்காத ஆசிரியர் கூட்டணியினர் ஆர்ப்பாட்டத்தில் ஈடுபட்டனர். ஆசிரியர் பணியிட மாறுதலில் முறைகேடுகளைத் தடுக்க, முதல்வர் உடனடியாகத் தலையிட்டு இப்பிரச்னைக்கு தீர்வுகாண வேண்டும் எனவும் அவர்கள் வலியுறுத்தினர்.